गांव

गांव हे एक झाडं आहे,
तिथेही माणुसरुपी पक्षी राहतात..
आपल्यासारखे काही पक्षी तिथे जन्म घेऊन मोठे होतात,
आणि कळायला लागल्यावर अन्न पाण्यासाठी
दुर जातात.
तर काही तिथेच जन्मतात आणि त्या झाडाच्या सहवासातच आपले आयुष्य व्यतीत करतात, तिथेच मरतात ही.
झाडासारखेच गावंही तिथे राहत असलेल्या पक्षांवर जिवापाड प्रेम करत,
पण दुर गेलेल्या पक्षांचीही परत येण्याची वाट पाहत असते,
त्यालाही ओढ असते आपल्या अंगा खांद्यावर खेळलेल्या पक्षांची.
गांव असतं झांडांप्रमाणेच ...
आपल्यांच्या आठवणीत अबोल ...
तसच स्थिर..
पण आतुन गलबललेल.

#जयंत.

फोटो- इंटरनेटवरुन साभार.

चिऊताई

प्रिय चिऊताई...

विषय: जागतिक चिमणीदिनाच्या तुला शुभेच्छा देण्याबाबत.....

तर प्रिय चिऊ,
      वरील विषयान्वये तुला जागतिक चिमणीदिनाच्या खुप खुप शुभेच्छा!
     
        म्हणशील स्वत:शीच की कोण हा मला शुभेच्छा देणारा....
 तु ओळखणार नाहीस मला,
      पण मी तुला लहानपणापासुन ओळखतो,
 अगदी जस मला कळायला लागल्यापासुन तुझ्या नावाचे घास खायचो,
 तु दिसलीस तरच जेवायचो....
 आई म्हणायची हा घास चिऊताईचा....
लहानपणी एकलेल्या तुझ्या चिऊताई चिऊताई दार उघड पासुन आपली ओळख,
 तुला पण तेवढच ताईपण दिल जेव्हढं माझ्या मोठ्या ताईला दिलं,
 तुम्हा दोघांनंतर अजुन एक ताई ती म्हणजे खारुताई,
 पण आज दिवस तुझा म्हणुन विषय फक्त तुझाच असेल.
 मी आज पण माझ्या लहान भाचींना चिमण्याच म्हणतो,
 आहेतच तुझ्या सारख्या गोंडस,
 हो गं....
 तु किती सुंदर दिसते माहीत आहे तुला,
 मस्त मुठीच्या आकाराची,
 लाल-तपकिरी-करड्या रंगाची,
 ती येवढिशी चोच....
 अजुन ही चिमणी म्हटलं की तुझं ते सुंदर चित्र डोळ्यासमोर येत गं,
  पण आता तु काही पहिल्यासारखी भेटत नाही गं,
  चुक आमचीच आहे मानव जातीची,
  आम्ही खुप स्वार्थी झालोय गं,
  जास्त उत्पन्न मिळवण्याच्या नादापायी रासायनीक गोष्टींचा वापर केलाय त्यामुळे तुझे जीवन धोक्यात घातलंय आम्ही,
  माफी मागतो मी सर्वांकडुन तुझी,
  कधी कधी दिसते कुठेतरी तारांवर बसलेली,
  लहानपणी धान्य वाळत टाकायचो,
  तेव्हा मीच असयाचो ते सांभाळायला,
  तु आलीस की मी हाकलुन लावायचो,
  त्याची आज पण लाज वाटते गं मला,
  तेव्हा मला कुठे कळायचं,
  की त्यात तुमचा पण हिस्सा असतो ते,
  पण आता नाही करणार तसं,
 असो तसं लिहिण्यासारख खुप आहे पण आता,
  जास्त काही लिहित नाही,

तुला पुन्हा चिमणीदिनाच्या खुप खुप शुभेच्छा!



                                                     तुझाच
                                                  एक बालमित्र.

फोटो- इंटरनेटवरुन संग्रहित.